काठमाडौँ । विश्व स्वास्थ्य संगठन (डब्लूएचओ)ले सशस्त्र प्रहरी बलको बलम्बुस्थित एपीएफ अस्पताल परिसरमा अस्थायी संरचनामा ९२ शय्याको अस्पताल निर्माण गरेको छ ।
डब्लूएचओको आर्थिक र प्राविधिक सहयोगमा निर्मित फिल्ड अस्पताल अस्पताल मंगलबार सशस्त्र प्रहरी बललाई हस्तान्तरण गरिएको हो । यस किसिमको संरचना डब्लूएचओले दक्षिण एसियामै पहिलो पटक नेपालमा निर्माण गरेको जानकारी दिएको सशस्त्र प्रहरीका सहायक प्रवक्ता शैलेन्द्र थापाले बताए ।
अस्पतालका संरचना पीभीसीबाट निर्मित हुन् । खासगरी भूकम्प, महामारी, अन्य विपत्तिलगायत आपतकालीन अवस्थामा बढी प्रयोग हुने बताइएको छ । ५ वटा ठूला र २ वटा साना संरचना बलम्बुस्थित एपीएफ अस्पताल परिसरभित्र निर्माण भएका हुन् ।
स्वास्थ्य सचिव डा. रोशन पोखरेलमार्फत डब्लूएचओका दक्षिण पूर्वी एशिया क्षेत्रीय निर्देशक डा. पुनम क्षेत्रपाल सिंहले हस्तान्तरण गरेका हुन् । त्यसपछि सचिव पोखरेलले अस्पताल सशस्त्र प्रहरी महानिरीक्षक राजु अर्याललाई हस्तान्तरण गरेका हुन् । महामारीका बेला स्वास्थ्य उपचार प्रणाली अवरुद्ध भएका बखत यस्तो सेवा बढी प्रभावकारी मानिन्छ । गम्भीर प्रकृतीको श्वासप्रश्वास संक्रामक रोगहरुको उपचारमा स्वास्थ्य सेवा, सुविधा प्रदान गर्ने उद्देश्यले यस्तो ‘ट्रिटमेन्ट फ्यासिलिटी’ निर्माण गरिएको बताइएको छ ।
यसमध्ये ७२ वटा शय्या जनरल वार्डमा रहनेछन् । १४ वटा सघन उपचार कक्ष र ६ वटा ट्रिएज बेड राखिएका छन् ।
हस्तान्तरण कार्यक्रममा स्वास्थ्य सचिव पोखरेलले कोभिड–१९ महामारीको कठिन अवस्थामा समेत सशस्त्र प्रहरी अस्पतालले कोभिड डेडिकेटेड अस्पतालको रुपमा अनुकरणीय योगदान पुर्याएको र त्यसकै उपलब्धीका रुपमा विश्वस्वास्थ्य संगठनले विश्वास गरेर यी संरचना निर्माण गरेको बताए । यस्ता किसिमिका फिल्ड अस्पतालले श्वासप्रश्वाससँग सम्बन्धित महामारी र विपद्को समयमा आम जनतालाई प्रभावकारी रुपमा सेवा प्रदान गर्ने उनले बताए ।
डब्लूएचओका दक्षिण पूर्वी एशिया क्षेत्रीय निर्देशक सिंहले दक्षिण पूर्वी एशिया क्षेत्रमा नै पहिलो पटक संचालन हुन लागेको यो अस्पतालले गम्भीर प्रकृतिको स्वासप्रस्वासका संक्रामक रोगहरुको उपचारमा सेवा प्रदान गर्न आवश्यक दक्ष जनशक्ति तथा भौतिक पूर्वाधारहरु पूर्वतयारी अवस्थामा राख्ने र सामान्य अवस्थामा समेत दक्ष उपचार सेवा प्रदान गर्ने बताए ।
सशस्त्र प्रहरी महानिरीक्षक अर्यालले प्राकृतिक बिपत्ति महामारी व्यवस्थापनमा सशस्त्र प्रहरी बलले निर्वाह गर्दै आइरहेको जिम्मेवारीहरुलाई थप प्रभावकारी बनाउन यसले अझै टेवा पुग्ने बताए ।
