काठमाडौँ । लुम्बिनी प्रदेश सरकारबाट माओवादी बाहिरिएको छ । माओवादीका सबै मन्त्रीहरुले आइतबार मुख्यमन्त्री लीला गिरि समक्ष राजीनामा दिएका छन् । राष्ट्रपति निर्वाचनबाट संघमा नयाँ गठबन्धन बनेपछि त्यसको असर प्रदेशमा पनि परेको हो ।
राजीनामा बुझाएपछि प्रदेश प्रमुखको कार्यालयमा जाने क्रममा कांग्रेसको प्रदेश कार्यालयमा माओवादी र कांग्रेसका नेताहरू ।
लुम्बिनीमा एमाले नेतृत्वको सरकार छ । सरकारलाई दिएको समर्थन फिर्ता लिँदै आर्थिक मामिला मन्त्री जाेखबहादुर महरा, भौतिक पूर्वाधार विकासमन्त्री ईन्द्रजीत थारु र आन्तरिक मामिला कानुन तथा सहकारी मन्त्री कृष्णा केसीले मन्त्री पदबाट राजीनामा दिएका हुन् ।
संसदीय दलका नेता एंव आर्थिक मामिला मन्त्री जाेखबहादुर महराले केन्द्रको निर्णयअनुसार सरकारबाट बाहिरिएको बताए ।
माओवादीकाे राजीनामासँगै एमालेबाट निर्वाचित मुख्यमन्त्री लिला गिरिले राजीनामा दिने कि विश्वासको मत लिने दुई विकल्प रहनेछन् । गिरी गत पुस २७ गते मुख्यमन्त्री नियुक्त भएका थिए ।
गिरीलाई नेकपा एमालेका २९, माओवादी केन्द्रका १०, राष्ट्रिय प्रजातन्त्र पार्टीका ४, नागरिक उन्मुक्ति पार्टीका ४, जसपाका ३, जनमत पार्टीका ३ जना, लोकतान्त्रिक समाजवादी पार्टीका ३ जना र स्वतन्त्र २ गरि प्रदेशसभाका १० मध्ये ७ दलका ५६ जना र २ स्वतन्त्र गरी ५८ सांसदको समर्थनमा मुख्यमन्त्री नियुक्त भएका थिए । भने कांग्रेसका २७ नेकपा एकीकृत समाजवादी र राष्ट्रिय जनमोर्चाका १-१ संसदले भने समर्थ गरेका थिएनन्।
लुम्बिनीमा ८७ सदस्यीय प्रदेश संसद रहेका छन। सरकार गठनका लागि भने ४४ सांसदकाे मत आवश्यक हुन्छ ।
