काठमाण्डौ । काठमाण्डौ उपत्यकासहित आसपासका क्षेत्र र तराईका जिल्लामा अहिले घाम लागेको छ ।
दिउँसो भने मौसम बदली भइ एक दुई ठाउँमा पानी पर्ने अनुमान रहेको मौसमविद् शान्ति कडेलले बताउनुभयो ।
उहाँका अनुसार अहिले गण्डकी, कर्णाली, लुम्बिनी र सुदूरपश्चिम प्रदेशको मौसम भने सामान्य बदली छ ।
यी चार प्रदेशका एक दुई ठाउँमा बिहानैदेखि पानी परिरहेको मौसमविद् कडेलले जानकारी दिनुभयो । यी प्रदेशमा प्रि मनसुनसँगै पश्चिमी वायुको प्रभाव परेको उहाँले बताउनुभयो ।
पश्चिमी हावा दिउँसो काठमाण्डौसम्म बहने सम्भावना रहेकाले अहिले घाम लागे पनि दिउँसो मौसम बदली हुने अनुमान गरिएको हो ।
यस्तै, दिउँसो पछि तराईका जिल्लामा तीव्र गतिमा हावाहुरी चल्ने सम्भावना रहेकाले सतर्कता अपनाउन मौसमविद्को सुझाव छ ।
