लुम्बिनी । हिमालयहरुलाई जलवायुले पारेको असरका विषयमा विश्वको ध्यान केन्द्रत गर्न नेपाल पर्वतारोहण संघले लुम्बिनीबाट शान्तिदीप कालापत्थर लैजाने भएको छ । शुक्रबार बिहान लुम्बिनीस्थित एक कार्यक्रमकाबिच लुम्बिनी विकास कोषका उपाध्यक्ष डा। ल्यारक्याला लामाले नेपाल पर्वतारोहण संघका पुर्व सचिव एवं केन्द्रीय कार्यसमिती सदस्य दिवस पोख्रेल , सगरमाथा आरोही संघका महासचिव शिव बहादुर सापकोटा र विश्व कृतिमानी सगरमाथा आरोही स्पिट काजी शेर्पालाई शान्तिदीप हस्तान्तरण गरे ।
लुम्बिनीबाट लगेको शान्तीदिप काठमाडौंको स्वयम्भु र बौद्धमा प्रज्वलन गरेपछि मंगलबार कालापत्थर लगिने नेपाल पर्वतारोहण संघका पुर्व सचिव एवं केन्द्रीय कार्यसमिती सदस्य दिवस पोख्रेलले बताए । सन २००९ मा बिश्वकै अग्लो स्थान सगरमाथाको कालापत्थरमा बसेको मन्त्रिपरिषदको बैठक स्थलमा लगेर कात्तिक २५ गते दीपलाई विश्वको ध्यान केन्द्रित हुने गरी प्रज्वलन गरीने पोख्रेलले बताए ।
संघको ५० औ वार्षिक उत्सवको अवसरमा नेपालमा रहेका हिमालयहरुलाई जलवायुले पारेको असरका विषयमा विश्वको ध्यान केन्द्रत गर्न र विश्वमा शान्तिको कामना गर्न लुम्बिनीदेखी कालापत्थर सम्मको कार्यक्रम तय गरिएको उनले बताए । सगरमाथा आरोही संघसँगको सहकार्यमा कातिक २५ गते कालापत्थरमा शान्तिदीप प्रज्वलन गर्नेदेखी राष्ट्र्रिय झण्डा फराउने लगायतका कार्यक्रम रहेको उनले बताए ।
दीप हस्तान्तरण गर्दै लुम्बिनी बिकास कोषका उपाध्यक्षका डा। लामाले शान्तिदीपले विश्वमा शान्तीको सन्देश फैलाउदै हिमालयलाई जलवायु परिर्वतनको असरबाट जोगाउन सकारात्मक सन्देश दिने बताए । संयुक्त राष्ट्रसंघका महासचिव एन्टोनियो गुटेरेस नेपाल भ्रमणका क्रममा पनि जलवायु परिवर्तनका कारण हिमायलहरुमा परेको असरका बारेमा चिन्तित देखिएको बताउँदै हिमालयहरुलाई जोगाउन हामी सबैको दायित्व गरेको डा। लामाले बताए । सन २००९ मा दश बुँदे सगरमाथा घोषणापत्र जारी गर्दै विश्वमै पहिलो पटक सवैभन्दा बढी उचाइमा कालापत्थरमा मन्त्रिपरिषदको बैठक बसेको थियो ।
वातावरणीय परिवर्तनले पारेको असरबारे विश्वको ध्यानाकर्षण गराउन सगरमाथाको आधार शिविरस्थित ५ हजार २ सय ४२ मिटरको उचाइमा रहेको कालापत्थरमा बसेको मन्त्रिपरिषद् बैठकले जलवायु परिवर्तनप्रति सामूहिक प्रतिवद्धता जनाएको थियो । संयुक्त राष्ट्रसंघका महासचिवले हालै सम्पन्न भ्रमणमा हिमालमा जलवायुले पारेको असरका बारेमा चिन्ता व्यक्त गरेका थिए ।
