कपिलवस्तु । सानो सानो कामको लागि पनि वडा र नगरको मुख ताक्ने बानिले नेपालमा प्रभावकारी विकास हुन नसकेको रास्ट्रिय सभा सदस्य बिमला घिमिरेले बताउनु भएको छ । विहिवार मोर्मी टोल विकास संस्था बाणगङ्गा ८ द्वारा आयोजित शुभकामना आदानप्रदान तथा अन्तरक्रिया कार्यक्रममा बोल्दै उहाँले साना विकास निर्माण तथा व्यवस्थापनका काममा पनि सरकारको मुख ताक्न नहुने बताउनु भएको छ ।
आफु सहित धेरै व्यक्तिले लामो समयदेखि गरेको अथक प्रयासले मात्र बाणगंगा जिल्लामै उत्कृष्ट बन्न सफल भएको दाबी गर्दै विकास निर्माणको काम एकै पटक नहुने भन्दै धैर्य गर्नुपर्नेमा उहाँको जोड रहेको छ । सरकारले गर्न खोजेका काममा स्थानियले सहयोग नगर्दा समेत विकासमा प्रभाव परेको उहाँले बताउनु भएको छ ।
त्यस्तै मेयर चक्रपाणी अर्यालले स्थानियहरुको गुनासाहरुको सम्बोधन गर्दै आफु निर्वाचित भैसकेपछि नगरका हरेक ठाउँका समस्या र गुनासा सुन्दै सम्बोधन गरिरहेको भन्दै नगरको विकास गर्न बाट टाढा नभाग्ने प्रतिबद्धता व्यक्त गर्नुभयो । नगरका प्रमुख समस्याको रुपमा रहेको छाडा पशुचौपाया, कृषकलाइ आवस्यक पर्ने मल तथा बिउविजन, शिक्षा, स्वास्थ्य, लागुपदार्थ दुव्र्यसनी लगायतका समस्यालाइ नगरले समाधान गर्न पहल गरिरहेको बताउनु भएको छ । जनताका समास्या समाधान गर्न नगरको क्षेत्राधिकार भित्र पर्ने हरेक काम गर्न नगर प्रतिबद्ध रहेको उहाँले बताउनु भएको थियो । सिमित साधन स्रोतका कारण स्थानियको आसा र अपेक्षा अनुसार काम गर्न नसकेको स्विकार गर्दै आफुहरुले प्रदेश र केन्द्र सरकार सङ्ग प्रमुख समस्याको समाधान गर्न जोडदार माग गरिरहेको समेत उहाँले बताउनु भयो ।
त्यस्तै नगर उपमेयर रिता कुमारी चौधरीले केहि नियम कानुनका कारण अपाङ्गता भएका व्याक्तिहरुले भत्ता नपाएको स्विकार गर्दै उक्त समस्याको समाधान केन्द्र बाटै हुनुपर्ने बताउनु भयो । कृषकका समस्या समाधानमा नगर सधै तत्पर रहेको भन्दै मल लगायतका समस्यामा केन्द्र बाटै अफ्ठ्यारो परेको चौधरीले बताउनु भएको छ ।
बाणगङ्गा नगरपालिका वडा नम्बर ८ का वडा सदस्य शैलेन्द्र बेल्बासेले यस्ता कार्यक्रमले जनताका ससाना समस्या र गुनासाहरु जनप्रतिनिधि सम्म पुग्ने भएकाले यस्ता कार्यक्रम अन्य टोल विकास संस्थाले पनि गर्नुपर्ने बताउनु भएको छ ।
कार्यक्रम माथि प्रकाश पार्दै टोलविकास संस्थाका अध्यक्ष ज्वारिलाल घिमिरेले आफ्नो टोलमा भएका समस्याको बारेमा नगर प्रमुख र रास्ट्रिय सभा सदस्य समक्ष जानकारी गराउनु भएको थियो । उहाँले खानेपानी, सरसफाइ, छाडा पशुचौपाया, सामुदायिक विद्यालयको खस्कदो शैक्षिक गुणस्तर, लागुपदार्थ दुव्र्यसनी, क्षयरोग लगायतका दीर्घ रोग लगायतका समस्याको बारेमा जनप्रतिनिधिहरुलाई अवगत गराउनु भएको छ ।
समाजसेवी रविराज आचार्य, बाणगङ्गा मावि लौगाइका अध्यक्ष हुमनाथ पौडेल लगायतले बोल्दै नगर र जिल्लाको विकासको लागि सबै पक्ष मिलेर जानुको विकल्प नभएको बताउनु भयो । बाणगंगा नदिजन्य, काठजन्य लगायत विभिन्न क्षेत्रमा निक्कै धनि रहेको भन्दै यसको सहि सदुपयोग गर्नुपर्नेमा जोड दिनुभयो ।
कार्यक्रममा स्थानियहरुले कृषकका समस्या, युवाहरुलाई खेलकुदका समस्या, छाडा पशुचौपाया, सरसफाई, नेटवर्कको लागि टावर, ढल, कुलो लगायतका विषयमा समस्या राखेका थिए ।
मोर्मी टोल विकास संस्थाका अध्यक्ष ज्वारिलाल घिमिरेको अध्यक्षतामा भएको कार्यक्रममा कार्यपालिका सदस्य, वडा सदस्य, टोल विकास संस्थाका पदाधिकारी, टोलवासी लगायतको उपस्थिती रहेको थियो । कार्यक्रम टोल विकास संस्थाका उपाध्यक्ष हरि प्रसाद पोख्रेल स्वागत तथा भागिरथ न्यौपानेको सञ्चालनमा सम्पन्न भएको थियो ।
