कपिलवस्तु । मंसिर २१ गते देखि पौस १ गते सम्म हुन लागेको १४ औँ कपिलवस्तु महोत्सवको तयारी तिव्र गतिमा भैरहेको छ । बाणगंगा वेयलफेयर सोसाइटीको आयोजनामा चार नम्बरको बुद्ध रङ्गसालामा हुन लागेको महोत्सवको मंगलबार सम्म करिब ५० प्रतिशत काम सम्पन्न भएको महोत्सव संयोजक तथा बाणगंगा वेयलफेयर सोसाइटीका अध्यक्ष राजकुमार खाँणले उपकार अनलाईन सङ्ग बताउनु भएको छ ।
भौतिक संरचना निर्माण, प्रविधिक लगायत महोत्सव सम्बन्धी सम्पुर्ण काम २१ गते भन्दा केहि दिन अगाडि नै सक्नेगरि काम तिव्र गतिमा भैरहेको संयोजक खाँणले बताउनुभयो । उहाँका अनुसार हालसम्म ब्राउन्ड्री निर्माण, स्टल निर्माणको काम सम्पन्न भईसकेको छ । अहिले सचिवालय, गेट निर्माणका कार्य धमाधम भैरहेको बताउनुभयो । त्यस्तै अहिलेको महोत्सवमा करिब २ लाख ५० हजार दर्शक उतार्ने बताउँदै करिव डेढ करोड रुपैया बराबरको आर्थिक कारोवार गर्ने लक्ष्य आयोजकको रहेको छ ।
महोत्सवका निर्देशक तथा बाणगंगा वेलफेयर सोसाइटीका महासचिव बुद्धि बहादुर रोकाहा दिनेशले कपिलवस्तुको उत्पादनलाई बजारीकरण गर्नका लागि र आर्थिक क्षेत्रलाई चलायमान गर्न महोत्सवले महत्वपूर्ण भूमिका खेल्ने विश्वास व्यक्त गर्नुभयो ।
त्यस्तै यता स्टल संयोजक मिन थापाले ३ सय स्टलमा २ सय भन्दा धेरै स्टल बुकिङ भैसकेको बताउनु भएको छ । कुल ३०० सटलहरुमा केहि स्टल निशुल्क कृषि, घरेलु, शैक्षिक लगायत विभिन्न सामाग्रि प्रदर्शनको लागि प्रदान गरिने समेत उहाँले बताउनु भयो ।
