बुटवल । सिद्धार्थ बाल तथा महिला अस्पताल (आम्दा)का मेडिकल सुपरिटेण्डेन्ट डाक्टर राजेन्द्र बस्यालमाथि आक्रमण गर्नेलाई कारबाही र सुरक्षाको माग गर्दै चिकित्सकहरुले बिहीबार इलाका प्रहरी कार्यालयमा धर्ना दिएका छन् ।
सोमबार सुत्केरी हुन भर्ना भएकी गुल्मीको सत्यगती गाउँपालिका–२ ठूलोलुम्पेककी ३२ वर्षिय भवानी रासकोटीको मंगलबार बिहान १० मृत्यु भएको थियो । उनले अस्पतालमै शल्यक्रिया मार्फत ५ किलोको बच्चा जन्माएकी थिईन् । बच्चा सकुशल छन् ।
चिकित्सक कुटपिट गर्नेलाई कारबाही र सुरक्षाको माग गर्दै नेपाल चिकित्सक संघ, नेपाल मेडिकल एशोसिएशन, नेपाल फार्मेसी संघ, नेपाल स्वस्थ्य प्राविधिक संघ (पान), मेलान, निजी अस्पताल व्यवसायी संघ (अफिन), आम्दा अस्पताल प्रशासनसहित आधा दर्जन स्वस्थ्य संस्थामा आबद्ध स्वास्थ्यकर्मीहरुले बिहीबार बिहानैदेखि इलाका प्रहरी कार्यालयमा धर्ना दिएका हुन् । चिकित्सकहरु धर्नामा गएपछि बिरामीहरुको उपचार सेवा प्रभावित भएको छ । दैनिक झण्डै २ सय बिरामीको उपचार हुने आम्दा अस्पतालमा मंगलबार रातिदेखि नै उपचार सेवा ठप्प छ ।
चिकित्सकलाई हातपात गर्नेमाथि कडा कारबाही हुनुपर्ने माग उनीहरुले राखेका छन् । संघका सचिव डा. सन्तोष पोखरेलले चिकित्सक माथि कुटपिट गर्नेलाई सार्वजनिक अपराध अर्न्तगत कारबाहीको माग गरेका छन् । चिकित्सकहरुले त्यहीअनुसार जाहेरी दिन लागिएको उनले बताए । प्रहरीले मंगलबार राती र बुधबार गरेर कुटपिटमा संलग्न भएको आरोपमा ७ जनालाई पक्राउ गरेको छ । उनीहरुलाई सार्वजनिक अपराध अर्न्तगतको मुद्दा दर्ता गर्न पनि चिकित्सकहरुले माग गर्दै आएका छन् ।
