कपिलवस्तु । कपिलवस्तुको बाणगङ्गा नगरपालिकाका प्रमुख प्रशासकिय अधिकृत भक्तिराम मरासिनीले बाणगंगा नगरपालिकाले अब केहि समयमा औद्योगिक प्रोफाइल निर्माण गरी नगर भित्र रहेका औद्योगिक समस्या, चुनौती र सम्भावनाका बारेमा अध्यन गर्ने बताउनु भएको छ । आज घरेलु तथा साना उद्योग कार्यालय तौलिहवा, कपिलवस्तुले कपिलवस्तु उद्योग वाणिज्य संघको कार्यालयमा नवौ कर दिवसको अवसरमा आयोजना गरेको अन्तरक्रिया कार्यक्रममा बोल्दै उहाँले यस्तो बताउनु भएको हो ।
प्रशासकिय अधिकृत मरासिनीले वर्तमान अवस्थामा ठुला उद्यागीहरुले साना र मझौला उद्योगीहरुलाई ठुलो माछाले सानो माछालाई खाए जस्तो खाईरहेको बताउनु भएको छ । यो स्थिती तत्काल नरोकिए केहि वर्षमा उद्योग व्यवसायको क्षेत्र सङ्कटमा पर्ने बताउनुभयो । राज्य सञ्चालन गर्न निति, विधि र प्रविधिको सफल कार्यान्वयन आवश्यक पर्ने भएपनि नेपालमा आवश्यक निति र निति अनुसारको विधि नभएको बतउनुभयो । सरकार पक्षले उचित विधि बनाउन नसक्दा अहिले आफ्ठ्यारो स्थिती आएको उहाँको तर्क रहेको थियो ।
कार्यक्रममा बोल्दै घरेलु तथा साना उद्योग कार्यालय कपिलवस्तुका अध्यक्ष प्रेम बहादुर गौतमले कपिलवस्तु उद्योग व्यवसायको क्षेत्रमा प्रशस्त सम्भावना भएपनि व्यवस्थापन हुन नसकेको बताउनु भयो । हामिले अहिले व्यवसायको क्षेत्रमा सबै सकियो भन्दै आस मारिरहेको भन्दै त्यस्तो डर लाग्दो स्थिती आईनसकेको दाबी गर्नुभयो । हामिले विदेशी ब्राण्डका कपडा लगायत विभिन्न वस्तुहरुको उपभोग गर्न मन पराउने बानी हटाएर स्थानिय उत्पादनलाई प्रोत्साह गर्नुपर्ने बताउनु भएको छ ।
त्यस्तै कपिलवस्तु उद्योग वाणिज्य संघका अध्यक्ष डोलकराम घिमिरेले वर्षेनी ठुलो सङ्ख्यामा बन्द हुँदै गैरहेका उद्योग तथा व्यवसायलाई रोक्न सरकारले विशेष योजना र कार्यक्रम ल्याउनुपर्नेमा जोड दिनुभयो । देशको अर्थतन्त्रलाई माथि उठाउन उद्यागी व्यवसायीहरुको विशेष भुमिका रहने भएपनि यस क्षेत्रको प्रबद्र्धनमा भने सरकार उदासिन रहेको उहाँले बताउनुभयो ।
त्यस्तै घरेलु तथा साना उद्योग महासंघ अध्यक्ष फुल कुमारी श्रेष्ठले स्थानीय उत्पादनलाइ प्रबर्द्धन गर्नुपर्ने बताउनु भयो । व्यवसायीक क्षेत्रलाई माथि उठाउनको लागि हामि सबै मिल्नुको विकल्प नरहेको उहाँले बताउनुभयो ।
त्यस्तै कपिलवस्तु उद्योग वाणिज्य संघका निवर्तमान अध्यक्ष उमानाथ पौडेलले सिङ्गो देशभर नै व्यवसायीहरु मारमा परिरहेको समयमा घरेलुले सहयोग गर्ने विश्वास व्यक्त गर्नुभएको छ ।
त्यस्तै उद्योग ब्यापार संघ कपिलवस्तुका अध्यक्ष खिमानन्द पौडेल (कोपिल) ले देशमा अहिले उद्योग व्यवसायहरु धमाधम बन्द भैरहदा उद्योग दिवसको शुभकामना दिन पनि खल्लो लाग्ने बताउनुभयो । उहाँले बाणगङ्गामा अलपत्र परेको औद्योगिक ग्रामको छिटो निर्माण गरेर सञ्चालन गर्न पनि नगरलाई आग्रह गर्नुभएको थियो ।
घरेलु तथा साना उद्योग कार्यालय तौलिहवा, कपिलवस्तुको आयोजना तथा कपिलवस्तु उद्योग वाणिज्य संघको सह आयोजनामा भएको कार्यक्रममा उद्योगी व्यवसायी धुर्व नेपाल, तिलक पाण्डे लगायत विभिन्न व्यक्तिहरुले उद्योग व्यवसायीहरुको समस्याको बारेमा जानकारी गराएका थिए ।
घरेलु तथा साना उद्योग कार्यालय कपिलवस्तुका अधिकृत विष्णु प्रसाद पोख्रेल को स्वागत तथा उद्यम विकास सहजकर्ता विनय कुमार सैनिको सञ्चालनमामा सम्पन्न भएको कार्यक्रममा घरेलु तथा साना उद्योग कार्यालय तौलिहवाका कर्मचारी, कपिलवस्तु उद्योग वाणिज्य संघका पदाधिकारी, विभिन्न संघ संस्थाका पदाधिकारी, लगायत यस क्षेत्रका उद्योगी व्यवसायीहरुको उपस्थिती रहेको थियो ।
यसैबिच घरेलु तथा साना उद्योग कार्यालय कपिलवस्तुका अध्यक्ष प्रेम बहादुर गौतमलाई उद्योग वाणिज्य संघ कपिलवस्तुले स्वागत गरेको छ । केहि महिना अघि सरुवा भएर अउनुभएका उहाँलाई आज उक्त कार्यक्रमका बिच स्वागत गरेको हो ।
