लुम्बिनी । लुम्बिनी आउने पर्यटकलाई सहज बनाउन लुम्बिनी सांस्कृतिक नगरपालिकाले नयाँ अभ्यास सुरु गरेको छ । पालिकाले पर्यटक आउँदा अल्मलिन नपर्ने उद्धेश्यले नगरपालिकाभित्रका सडकमा संकेत नम्बर(स्ट्रिट नम्बर) राखी पर्यटक आगमनलाई सहज बनाएको हो ।
नगरपालिका, नेपाल पर्यटन बोर्ड र यूएनडीपीको साझेदारीमा पालिकाका सडकमा ८० वटा संकेत नम्बर राखिएको हो ।
मंगलबार आयोजित एक कार्यक्रममा संकेत नम्बरको उद्घाटन गर्दै लुम्बिनी सांस्कृतिक नगरपालिकाका मेयर सजरुद्धीन मुसलमानले पर्यटन क्षेत्रको विकासका लागि नगरपालिका सधैं तत्पर रहेको कुरा उल्लेख गरे । उनले लुम्बिनी आइपुग्ने पर्यटकले हरेक मन्दिर घुम्दा वा लुम्बिनी चिन्न खोज्दा समस्या नहोस् भनी संकेत नम्बरसहितको बोर्ड लगाइएको बताए ।
‘पर्यटकलाई सजिलो बनाउने हाम्रो पहिलो प्रयास हो,’ उनले भने, ‘छिट्टै नै सूचना केन्द्र स्थापना गरी थप जानकारी प्रदान गर्ने जमर्कोमा छौं ।’ उनले पर्यटकले आकर्षणको केन्द्र मानेको लुम्बिनीको पर्यटकीय विकासमा पालिकाको भूमिका अहम् रहने र त्यसका लागि आफूहरू लागिपरेको जनाए ।
